Resubelpara, March 26, 2022:North Garo Hills a•jao donggipa Bajengdoba Sallingre songo mande saksani nokko Sonibar pringo wa•al kamaha ine kobor man•aha.
Ia a•sel ong•anio Sumjeng Sangma nokni pilak bosturangkon man•jaha. Kobor man•soani gitade, noko donggipa bosturanga mirong packet 5, tangka gong hajal 10, TV, Account Passbook, Id card, job card, ba•ra chola aro dingtang dingtang bosturangko wa•al kamchapaha ine u•iataha.
A•sel ong•ani bidingo nok nikgipa agana gitade mi-bijak song•e, a•palo me•su tarimitting somoio rang•san wa•al chadoe kamgopaha. Ua somoio segipa noko dongjachim. Ia a•sel ong•anio rasong gnangbee nokni manderang darangba saknaa gri jokaha. Ia a•sel ong•anio duko ga•akgipa nokdangna sorkari-ni gita dakchakaniko on•pachina ineba mol•molangaha.