Williamnagar, March 25, 2022: East Garo Hills a•jani Special Operation Team (SOT) pulis dolni gisiko nangbee sandirikitanichi saksa mandeko rim•sruke ra•angaoniko jokataha.
Pulisni u•iata gitade, saksa bilsi 57 ong•gipa Hanif Ali-ko March 23 tarikni waljatchi 12 bajimango ma•sina man•gijagipa manderang Nongchram songoniko rim•drae ra•angahachim.
Hanif Ali saksa me•su samjak palgipa ong•achim, uni Mahabel Marak minghipa mandeni noko tusiengachim, unomitting ma•sina man•gijagipa manderang Mahabel Marak-ni noko nape uko rim•sruke ra•angaha.
Ia obostani bidingo March 24 tarik attamo Rongjeng Pulis Station-o badi ka•aha. Indake ia obostani bidingo kobor-rangko man•soe, East Garo Hills a•jani SP am•sandianiko dakna a•bachengataha, indake am•sandigipa pulis dol ba operation team Dimit Chikamagre songo nape sandianiko dakenba Sukrobar attamni 1:30 bajimango donnue donenggipa Hanif Ali-ko jokatna man•aha ine u•iataha.
Rim•srukanggipa manderang pulisrang ba operation Team-ni sandiangako niksoe rang•san ning•tugipa buring bolgrimchi kate jokangaha ine EGH a•jani SP BA Sangma u•iataha.
Indake ong•genchimoba kate jokanggipa denggu manderangko rim•na operation team sandienga ineba u•iataha.