20 Jan 2022, Baghmara: Re•anggipa bilsio, covid sabisini ta•rake giproroani a•selo, Tyisam Festival ko South Garo Hills a•jao maniangna man•jaha indiba ia bilsini January jani 19 tarik o ia festivalko Baghmara songjinma ona manderangko an•saoatna sokbataiaha. Ia Festival ko Siju-Rongara elekka ni MLA Pa Rakkam A Sangma oprake on•angaha.
‘Tyisam’ ine aganon ia katta atong ku•sikchi ‘Chisam’ ine ong•a aro bimungna kra•e ia festival ko nitogipa Simsang chibima ni rikgam o ong•atenga.
“An•chingni MDA sorkari ko chalaienggipa aro an•ching a•dokni Skotong Minister Pa Conrad Sangma ni an•chingko re•dilengon, an•ching a•ja o bang•a dingtanganirangko mikkangchi re•baenggipa salrangoba nikangkuna gita man•gen. Je manderangan sorkarini kamko sengaigija an•tangna kamtangko bikotdraengachim, game ge•e cha•engachim aro an•tangni changa sapanichi sol•e repe pale sime cha•engachim, uarangna dakchakna gita sorkari an•tangtangni do•gako oe donenga aro ia dakchakanirangko na•simang indin watgale galnabe. Meghalaya a•dokni bilsi 50 gapaniko maniengon a•dok gimiko SGH a•jao manienggipa Tyisam Festival an dalbatgipa ong•a” ine Pa Rakkam Sangma Tyisam Festival ko oprake on•angmiting somoio jinmana aganaha. Meghalaya a•dokni bilsi 50 gapaniko manian baksa Tyisam Festival-ko apsan bakrime manianganinaba Siju-Rongarani MLA dingtangmancha SGH District Administration-ni manderangko mitelpile aganangaha.
Tyisam Festival ko 19 tarik oni 21 tarik ona manianggen aro ia manianio District Expo koba ong•atjolenga jeon manderang an•tangtangni changa sapaniko jinmana parakangna gita cholko onggen. Manderangko ansaoatna Garo Hills ni dingtang dingtang artists rangkoba “Musical Night” o jinmana ring•e on•angchina cholko on•gen. Unbaksana jro susaani, ring chosusaani, chrok susaani, git ring•susaani, pul me•su aro bite rangko mesok susaani, Baby Show, Skit Competition, Fancy dress Competition aro dingtang dingtang kal•susaanirangko ong•atanggen ine Organisers rang u•iataha.
Department of Information and Public Relations (DIPR) opis ni karimskarang Meghalaya a•dok maikai ong•baaha, bilsi 50 na skang maidake dakahachim aro da•o maidake dakaha uarangni dingtanggrikaniko jachipchang rango jinmana me•sokanggen ine u•iataha.