Tura, August 29, 2022: Garo Hills a•jaoniko sriksrik bolrangko rate Assam a•dokona bading chiwalanirangko da•onaba dontongkujaenga. AYWO Garobadha Regional Branch, Garo Hills a•jaoniko Assam a•dokona bolrangko sruk sruk cha•ue salangenga ine koborrangko man•soe, sandianiko dakenba Bolero Pick-up bolsa ML-08G-3739 gariko Damalgre Mellim ramao rim•aha ine parakataha.
Bol cha•ugipa manderang bolrangko cha•ue ratenba bolero pick-up gario Assam a•dokona ra•angna miksongengachim. Sing•sandianiko dakahaon uamango GHADC-Forest Department aro State Forest Department-ni on•gipa lekkarang dongja ine u•iataha.
Indake AYWO Garobadha Regional Branch, bol salangenggipa bolero pick-up gariko rim•e, WGH a•jani Range Forest Officer aro GHADC-ni Chief Forest Officer-na pakwataha.
“WGH aro SWGH a•jani ning•o donggipa songrang jekai Mellim, Amindagre (Gambegre), Damalgre, Rangsakona, Maljanggre, Nogapara, Gongglanggre, Boldoka, Kalchengpara, Selsella Block-ni ning•o donggipa Mangchim, Dengasi aro Mukdangra songrangoniko salon bolrangko niamgri ratdrae ra•angenga ine nikna gita man•a. Union sorkari aro a•dok sorkari bang•a niamrangko ra•gataha, indiba manderang sorkarini dongimin niamni kosako kamrangko ka•enga. Uamang buring bolgrimo janggi tangenggipa do•o matrang aro buringni jonturangna chanchigija bolrangko skatang nosto ka•e galenga. Uni gimin chinga AYWO indakgipa kamrangko bon•atna raken kamrangko ka•anggen aro chinga buring bolgrimko ripinggija bolrangko den•ne galgiparangni kamko raken jegalata ” ine AYWO South West Garo Hills Zone-ni President Mackenseng Sangma parakataha.