Tura, Aug 28, 2022: Garo Hills Autonomous District Council (GHADC)-o kam ka•enggiparangni dol Non Gazetted Employee Association (NGEA)-ni dongimin niam gita dilgiparangni term ba sal somoi bon•ahani gimin re•baenggipa August 31 tarik Budbar pringni 11:30 bajio General Meeting-ko GHADC Office-o ong•atenga ine u•iataha.
Ia tom•anio darangkoba matnange aro galone chanchiani dongjawa. Indiba NGEA-ni Executive Committee Membor-rangni term bon•ahani giminsa gital NGEA-ni dilgiparangko seokangtaina tom•aniko ong•atenga ine NGEA-ni Secretary Brithen M.Sangma u•iataha.
Uni gimin, August 31 tariko GHADC Office-ona kam nangani gimin re•bagiparang adita somoirangko office-o sengna nangnaba donga, uni gimin sakantinan chakchike sengpajachina Brithen Sangma sakantikon mol•molataha.