Assam pulis Gazing Salbari songni sakdok manderangko rim•a 

0

Kamrup, June 8, 2022:Meghalaya aro Assam a•dokni sima ario donggipa Meghalaya-ni mande saksa Assam a•dokoniko a•a pattana dorgasto galani gimin songni manderang ua mandeni gue aro nokko nosto ka•ani gimin Gizang Salbari songni skotong saksako man•chape gipin sak bonga manderangko Assam pulis rimaha ine kobor man•aha.

Koborni gitade, Gizang Salbari songara sima ario donggipa West Khasi Hills a•jani Hima Nonglang a•kingni ning•o ga•akachim. Rim•ako man•gipa sakdok manderangara songni headman Kribin Sangma, dakchakgipa headman Demarson Marak, songni secretary Pairosh Marak aro sakgittam executive membor-ranga Brejion Sangma, Raisend Marak aro Gilseng Shira ong•achim.

Ia sakdok manderang saksa Becline G.Sangma-ni niam gri ong•gija, Assam a•dokoniko a•a patta tarina dosgasto galani gimin dai gamatani ja•mano, uamangko rim•china ge•etaniko man•ne Boko Pulis Station-ni pulisrang rim•aha.

Rim•a man•gipa manderangni paraka gitade, Gizang Salbari song skangonin Meghalaya a•doko ga•akachim, indiba Becline G.Sangma niam gri Assam a•dokoniko a•a patta tarina dorgasto galahani gimin uni kosako action ra•aha. Indake Becline G.Sangma Gizang Salbari songni headman aro unbaksa kam ka•gipa manderangni kosako Becline G.Sangma Boko Pulis Station-o badi ka•aha. Gizang Salbari songni manderang ka•onange Becline Sangma-ni gue bipangrangko de•npee gala baksana uni nokko nosto ka•aha kobor man•aha.

Becline Sangma-ni badi ka•anio pangchake, Assam pulis Gazing Salbari songni sakdok manderangko rim•china June 5 tariko Boko Pulis Station-na ge•etaniko on•ataha. Indake uamang sakdokko June 7 tarik Monggolbar salo rim•e, Guwahati pattokona watataha ineba kobor man•aha. Badi ka•gipa Becline Sangma, Umshiak Upper Primary Skulni skigipa ong•achim.

Ia a•selni bidingo West Khasi Hills a•jani HYC Unit baksa Gazing Salbari songni manderang Budbar salo West Khasi Hills a•jani Deputy Commissioner-na lekka seate rim•a man•gipa sakdok manderangko Assam Pulis Custody-oniko wtchina kam ka•atpachina didiataha.

Leave A Reply

Your email address will not be published.