Shillong, December 29, 2022: Meghalaya sorkari 2022 bilsini March jao ASHA kam ka•giparangna Payment Mobile Application-ko bikote on•aha, indake ia mobile app namgipa review-rangko man•engaha ine koborna u•iataha.
ASHA Payment Mobile Application-ko tarie on•aoni ASHA-o kam ka•giparangna gong kror 12 lak 29 tangkarangko a•dok sorkari on•ataha. Ia mobile application-ko tarianichi, sal 120-o matchotatnagipa kamrangko sal 5-on matchotatna gita man•aha.
“A•dok sorkari Health Sector-ko namdapatna aro tang•dodapatna rakbee kamrangko ka•aha. Indake Health Sector-ni ning•o donge kamko ka•enggipa, ASHA-rangna altue dormaharangko on•na gita ASHA Payment Mobile Application-ko a•dok sorkari tarie on•aha. Uamang Covid sabisini somoimo janggi tangna kengija sabisiko warachakna aro jinmana naljokaniko ra•bana rakbee kamrangko ka•aha. Uamangni kamrangko niate sorkari kamrangko altudapatna gita ia app-ko tarie on•aha” ine Conrad Sangma parakataha.
Meghalaya a•dokni song dam prakon, ASHA sakprakko donaha. Indake a•doko sak 7,047 Register ka•gipa ASHA-rang gnang. ASHA-o kam ka•giparangna japrako gong hajar 3000 dormahako man•enga, uandake Helper ba dakchakgiparang gong hajar 1000-ko sorkarini gita man•skaenga. Indake ma•mong sorkarini on•atgipa baksa chandimatgenchimode, ASHA-o kam ka•enggiparang ja prako gong hajar 7500 aro Helper-rang hajar 3250 tangkarangko man•enga ine koborna parakataha.