Williamnagar, Sept 29, 2022: A•chik Organization for Social Welfare (AOSW), HQ Williamnagar, Samanda C&RD Block Officer-rangni kamko raken jegalataha.
“Chinga RTI ka•e nion Samanda Block, 2021-22 bilsini Project List-ko nikna gita man•aha. Dengagre-oni Matchakolgre-ona miter 400-ni ramako tarina on•aha, indiba miter 200 ramakosan tariaiaha. Project List-o mesokani gitade, rama a•samo nala (drain)-koba tarina nangachim, indiba drain tarijaha aro ramakoba miter 200-kode tarijaha. Indake manderangni namgnina sokatgipa kamrangko matchotgija ka•e galaniara, a•dok chigana gimaani ong•a” ine AOSW-ni President, Tambu A Sangma parakataha.
Songni manderangni matnanganiko man•ne, Samanda Block-ni Officer-rang ia ramako August 10 tariko nina re•angaha aro uamang ia ramako matchote tarie on•gen ine ku•rachakaha. Indiba September ja bon•angpiloba ia ramarangko matchote on•kujaenga. Uni gimin chinga AOSW-ni gita Block Office-rangko somoi gita kamtangko ka•na ku•mitchetatangko chu•sokatchina mol•molangaha.