Tura, July 6, 2022: West Garo Hills a•jao donggipa A•kawe jolni dolsa NGO Anti Corruption League (ACL) Hallidayganj Unit, GHADC-ni Chief Executive Member (CEM)-na lekka sedoataha.
ACL-ni janapatani gitade, Jeldopara A•kingni ning•o donggipa Panbari songo niam gri a•palni manderang napdrae dongenggipa a•arangko nirok sandichina didiataha.
Gipin a•songni manderang salantian A•chik songona napdrabae a•arangko ra•sekdrae roenga. Uamang A•chik a•songni a•arangko nirokenggipa A•king Nokmarangko dagrange ka•mikkenatenba a•arangko ra•sekdrana jotton ka•enga. Uamang Jedolpara, Boldamgre, Bolongre aro Panbari A•kingni a•arangko ra•sekdraenga. Uano songdongenggipa A•chikrang aro wilwilao dongenggipa manderangna bang•a neng•nikani ong•enga ineba janapataha.
“Uamangni niam gri napdrabae dongani a•sel songo noko songdongsoenggipa bang•a nokdangni manderang neng•nikanirangko chagrongna nangenga. Songni manderang an•tangtangko naljokatna nok jamko watgale Garo Hills-ni ning•tugipa biaprangchi katange songdongna nangpilenga. Indake a•palni manderang napdrae niam gri songdongenggipa manderangna songni Nokma certificate-rangko on•enga, indake uamang Nokma, VEC Secretary-rango pangchake A•kingni ning•o ga•akgipa a•arangko ra•sekdrana jotton ka•enga. Uasan ong•aigija uamang an•tangtangni bimingko elektoral roll aro Job Card-rango segate ra•tokengaha” ineba u•iataha.
Uni gimin songni manderang EPIC Card, Job Card aro uandake dingtang dingtang (documents) ba lekkarangko nirok sandina nangchongmotenga. Indake Mouza no. Vl/3-ni sima ari jolo songdongenggipa manderangni (documents) lekkarangko GDC Authority-ni on•gipa ong•ama ong•ja, uarangko sandina nanga ine ACL janapataha.