AGHSSASTA, Prime Minister-na lekka sedoata, February jaoni dormaha man•kujani gimin ma•ringa
Tura, July 6, 2022: All Garo Hills SSA School Teachers’ Association Central Body (AGHSSASTA-CB), West Garo Hills a•jani Deputy Commissioner-ni jak gita A•songni Prime Minister Narendra Modi-na lekka sedoataha.
AGHSSASTA-ni janapatani gitade, Samagra Shiksha Abhiyan (SSA) skulo skigiparang re•anggipa February jaoni dormaharangko man•kujaenga ine parakataha.
“Chinga SSA skulo skigiparang adita bilsirangonin dormaharangko somoi gita man•rongja. Chinga ia obostani bidingo changni chang tom•aniko ong•ate, jinma apsan ku•monge a•dokni Skotong Minister Conrad Sangma aro Education Minister Lakhmen Rymbui-na lekka sedoataha, indiba da•alona kingkingba maming aganchakaniko man•soja. Chinga batanggimin PAB 2021-22, February 2021-oni March 2022-ona chu•gimik dormaharangko man•kujaenga, ia dormaharangko gital PAB 2022-23-ko ra•gatna skangan chu•gimik dormaharangko Union Sorkari, A•dok Sorkarina sokatna nanga. Union Government gital PAB 2022-23-ko a•dok sorkarina sokatkujani a•selo chinga dormaharangko man•sokujaenga. Dormaharangko somoi gita man•jani a•sel, chinga bang•a changon duk mikchi ong•e, salantini janggi tangna nangenga. Indita jarangna dormaharangko somoi gita man•jagenchimode, chinga maikai noktangko nirokgen aro maikai skulrango skigen. Chingni neng•nikarangko niate, chingni man•na nangenggipa dormaharangko sokatna nangchongmota” ine AGHSSASTA-ni President LG Momin janapataha.