Tura, Sept 12,2022: West Garo Hills pulis aro ANTF dol Robibar salo drugs badinggiparangko am•sandina a•bachengaha aro indake konta 15 mangna am•sandianiko dakenba maruti car bolsa baksa drugs ba pekgipa bosturangko badinggipa sakgittam manderangko Selsella A•gipenggre-oniko rim•aha ine kobor man•aha.
Pulisrangni koborna u•iatani gitade, ANTF dolni gisiko nange aro neng•bee am•sandianichi maruti car bolsa ML-10, 5575 baksa sakgittam manderangko rim•na man•enba ANTF dolni sandirikitanio chu•sokgipa ong•aha.
Rim•a man•gipa sakgittam manderanga Tura Dobasipara-oni
Matgrik Ch.Marak, Daren Agal-oni Jaksram Ch.Marak aro Daren Agal-oni Bringstar Ch.Marak ong•achim.
ANTF, rim•a man•gipa sakgittam manderangoniko heroin gram 10.22, ma•sigijagipa grey rongni Ginchi ba powder gram 92.54, tangka gong 57,500, rong tangsim plastic ge•sa, samni bikrok ba cover-o Clavam ine segipa ge•sa, chongipa bostu ra•chakani ba plastic container ge•sa,
Maruti 800 Car ML-10, 5575 bolsa, mobile phone ge•gittam aro ong•gija kamrangna jakkalgipa bosturangko man•aha.
Pulis iani bidingo mamla ba case-ko segataha aro sing•sandianiko dakenga ine u•iataha.