Ranikor, August 10, 2022: All Khasi Hills A•chik Federation (AKHAF) Headquarter Shillong, Monggolbar salo a•dokni Skotong Minister Conrad Sangma-ko gronge Khasi Hills a•jao songdongenggipa A•chikrangni chagrongenggipa neng•nikanirangko janape segimin Memorandum-ko on•angaha.
“South West Khasi Hills, East Khasi Hills, West Khasi Hills, East Khasi Hills aro Ri-Bhoi a•jarango songdongenggipa bang•a A•chikrang neng•nikaniko man•enga. Khasi Hills a•jani bang•a A•chik songrangon Garo Medium Skulrang gnang. Indiba Garo Medium Skulrango A•chik skigipa dongjani a•sel skulo poraienggipa chadamberang bang•a neng•nikaniko chagrongna nangenga. Garo Medium skulrango skigiparang A•chikku-ko man•gijagipa gipin jatrangsa ong•a. Indake skulni chadamberang skulo skiako ma•sina neng•niktokenga. Garo Medium Skulrango A•chik skigipako rakkijagenchimode, chatro chatrirang ku•tangkon gimaatgnok. Uni gimin chinga AKHAF-ni gita Garo Medium Skulo A•chik skigipako rakkina nanga” ine dabiangaha.
AKHAF-ni President Clivestar Ch.Marak-ni parakatani gitade, Meghalaya a•dokni Skotong songjinma Shillong-o bang•a dingtang dingtang sorkari Office-rang, namnamgipa Hospital-rang, aro skul kolege-rang gnang. Indake ong•engon Garo Hills aro Khasi Hills a•jani manderang Shillong songjinmaona re•baon dongchakna biap dongpajae neng•nikaniko man•enga. Hotel-rangosa waltuna nangenga. Bang•a manderang tangka paisa dongjaoba nangchongmotgipa kamna re•bagiparang Hotel-osa waltuna nanga. Uni gimin manderangni namgnina Shillong songjinmao Garo Guest House-ko rike on•na nanga, jedakode chel•aoni re•bagipa manderang tangka paisa komiao donge neng•nikanirangko komiatna gita man•gen.
Shillong songjinmao songdongenggipa bang•a kangal cholgri manderang me•su samjakrangko pale sim•e janggi tangenga, uamang mikka wachini somoio bang•a neng•nikanirangko chagrongenga. Uni gimin uamangna me•su samjakrangko palchakna gita dingtangmancha bajar antirangko tarie dokkanrangko rike on•china gitaba mol•molangaha.
CPWD-ni ning•o ga•akgipa South West Khasi Hills a•jao donggipa Mawphyllun aro South Garo Hills a•jani Moheshkola songni ramarang re•anggipa June 16 aro 17 tariko mikka jimbee waani a•sel nosto ong•aha, indake songni manderang re•a doanio namen neng•nikanirangko man•enga, Uni gimin manderangni neng•nikaniko niate ta•raken ramako tarie on•pilchina AKHAF dabiangaha.