Ranikor, July 12, 2022: All Khasi Hills A•chik Federation (AKHAF) South West Khasi Hills a•jani ning•o ga•akgipa Moheshkola songni manderangna Sombar salni bako mirongrangko suale on•angaha ine koborna parakataha.
AKHAF-ni u•iatani gitade, re•anghipa June 16 aro 17 tariko mikka jimbee waani a•sel dam 15 songni manderang cha•a ring•a gri, chola ba•ra gri duko ga•akaha. Uamang salanti duk mikchi ong•na nangaona sokaha.
“Chinga nosto ong•gipa chu•gimik songrangona re•ange nina gita man•jaha. Chinga an•tangtangni gita jotton ka•e Borsora songni rama nosto ong•gipako tarie on•angaha. South West Khasi Hills a•jani PHE Department-ni manderangba a•a rudapachi piperang nosto ong•aha, uamang ringani china mangmangba kosto ong•e chel•bea chiringrangchiko ko•ena nangengaha. Uni gimin PHE Department-ni manderang ta•raken Songni pipe-rangko tarie on•na nanga. Songni nokni obostako namatna dilgiparang South West Khasi Hills a•jani pilak songrangona re•ange nina nangchongmota” ine AKHAF-ni President Clivestar Ch. Marak janapataha.