AHAM-ni Winter Capital-na dabianio chakpaanina A•chik sakantikon GeorgePrince demittelata
Tura, March 8, 2022: Ia somoio A·chik jat gimikni ku·monganirang bilakbatroroenganiko nike AHAM-ni President Georgeprince Momin namen kusi ong•aniko parakatskaha.
“Anga saksa A·chik ong·pae namen kusi ong·bea aro iani gimin Garo Hills aro Khasi Hills-o donggipa gimikan ku·cholsan ong·anina anga mittelpilna sika” ine Pa Georgeprince Momin aganaha.
Ua A•chik jatni ku•cholsan ong•anina demittelatengon, Gitel Jihova-na rasongko on·ne mittelataha. “Jihova a·songko nirokjaode, a·songko nirokgiparang indin nitimgramaia aro A·chik jatko nirokgipa Jihova pangnaba tusija”. AHAM-ni Winter Capital-ko dabiengon A·chik a•songni kona-noksikbrio songdongenggipa A•chikrang ku·mong nangrimaniko on·ataniara jatni namgninan ong•a.
“Anga A·chik jatni pilak A·chik NGO-rang ku·silliting gita ku·monganiko on·ne ku·rang on·chake seanirango NGO dilgiparang Tura-o donge dilenggipa seng·gipa wa·sagipa Matgrikrang angna ka·donganiko on·atanina uamangko mittelna sika. Uni gimin somoi soko pilak NGO-rang apsan A·chik jatna ong·katgen ineba Georgeprince Momin parakataha.Tura-osan ong·aigija gipin biaprango dongenggipa A·chik NGO-rang Winter Capital-na dabianio chakpaanirangko on·atanina mittelpilaniko on•atskaha.
Indake ong•engon, dingtangmancha A·chik jatni brigimin Senior Citizen-rang jemangan jatna ka·sagiparang ong•achim, uamangni chingko mikkangchi ja·ku de·angchina didianiko on•ne bilchamko ching·e rakkina gita ku·pattianiko dondikgija on·engani giminba mittelangaha.
Unbaksana kamoni neng•takgimin officer-rang jemangan chakchikgija u•ianirangko on·ne didianirangko on·engachim, uamangni namgipa agan ku•pattianaba AHAM dilgipa mittelangaha.
Una agreba pilak Political dolni MLA-rang aro MDC-rang jemangan an·tangtangko NPP, AITC, Congress, BJP ba UDP dol ine changijan Winter Capital-ni bidingo ‘chinga nang’ baksa donga, maina chingaban A·chik jat ‘ine ku·rang on·ne ka·dongatahani gimin uamangkoba mittelangaha.
A·chik jat ong·e pulisrang ba dingtang dingtang department-ni officer-rang aro dingtang dingtang gadango kam ka·enggiparang AHAM baksa Winter Capital-ni bidingo chakpae ku·siltingo ka·dongani kattarangko agan ku·pattianina demittelaniko on•ataha.
Unbaksana bang•a Dingtang dingtang biapni A·chik ma·giparang, toromni dilgiparang chingna Isolo bi·chakachi Winter Capital-na dabianiko chu·sokatna krengpaengani gimin aro
A·chik Youtuber-rang, songbad-rang aro social mediarangni king·kot Winter Capital-na chakpaaniko on•aninaba Georgeprince Momin mittelangaha.