Tura, July 23, 2022: A•chik Holistic Awakening Movement (AHAM), NCERT-ni klas 3-na chappa ka•gimin ki•tapo Meghalaya a•dokni agangipa ku•rangko ong•gija gatsretaniko raken jegalata, baksana ia gatsretaniko ta•raken taripiljaode dal•a ja•kuko de•anggen ine parakataha.
AHAM, Education Department-ni manderangna ia ki•tapo gatsretaniko u•iataha. Indake NCERT-ni klas 3-na chappa ka•gimin Social Studies ki•tapo gatsretaniko namatpiljagenchimode, bang•a bi•sarang ma•sisretgnok aro ong•gijakosa poraimangnok. Uni gimin AHAM, Dhananjay Joshi aro Neelam Jain-ni segipa klas 3-ni lekkako taripiltaichina didiataha. Uamang Meghalaya a•doko Marathi, Bengali aro Hindi ku•sikkosa aganaha ine seaha. Indiba ian ong•srangja, Meghalaya a•dokni manderang Khasi, Pnar aro A•chik ku•sikkosa agana. Ia Ki•tapko segiparangni gatsretaniara, uamangni ong•kate sing•sandigija gipinoniko knasrete seasa ine nikna gita man•a. Ia ki•tapo Meghalaya a•dokni ku•kosan ong•aigija, gipin a•doko manianirangko ong•gija gatsretaha. Uni gimin ia ki•tapko skulrango jakkalaniko dontongatchengna nangchongmota.
Ia ki•tapko ta•rake gital taripiljagenchimode, chinga rakgipa ja•kuko de•anggen ine AHAM, CEB-ni President Georgeprince Ch Momin parakataha.