Tura, November 9, 2022: A•chik Holistic Awakening Movement (AHAM) CGB, Tura a•dokni Skotong Minister Pa Conrad Sangma aro Education Minister Lakhmen Rymbui-na lekka sedoate poraienggipa chatro chatrirangni Scholarship-rangko ta•rake on•china dabiangaha.
“Chingni Skotong Minister-ko grongani somoio, poraienggipa bi•sarangni scholarship-rangko antisani gisepon on•gnok ine ku•rachakaha. Indiba antigni batangpiloba, scholarship-rangko on•kujaenga. MDA sorkari Education-ko mikkango donne kam ka•genchimode, chatro chatrirangni man•na nangenggipa scholarship-rangko ta•rake on•na nanga. Skotong Minister antisani gisepon, scholarship-rangko on•gen ine ku•rachakgipa kattarangko social media-rango aro Songbad-rango niksona gita man•aha” ine AHAM-ni President Georgeprince Ch. Momin janapataha.
“Chadamberangni man•na nangenggipa scholarship-rangko darang dilgiparangba ra•seke ra•na man•jawa. Scholarship-an poraienggipa chatro chatrirangna on•pilskaani boksis gita ong•a. MDA sorkari poraienggipa bi•sarangni scholarship-rangko somoi gita on•na nanga. Bang•a kangal cholgrigipa chatro chatrirang scholarship-o pangchake poraienggiparang gnang. Uni gimin chinga AHAM rake kamrangko ka•anggen aro poraienggipa chadamberangna scholarship-rangko on•kuja dipet dabianiko dontongjawa” ineba AHAM-ni President parakataha.
Indakgipa obostarangko nigrike, poraienggipa chatro chatrirangni neng•nikaniko niate Skotong Minister aro Education Minister poraienggipa bi•sarangni scholarship-rangko somoi gita on•na nangchongmota ineba George Prince Momin dabiangaha.