Tura, January 4, 2022: A•chik Holistic Awakening Movement (AHAM) A•dokgre Regional Unit, a•dokni Skotong Minister Conrad Sangma-na lekka sedoate, Adokgre-oni Mangsang-ona tarigipa ramani bidingo janapataha.
“Adokgre-oni Mangsang-ona tarigipa ramako mande re•tona name tarijaha, unbaksana DPR-ni ge•etako ja•rikjaha. Uamang ramani black toppingko name on•jaha aro mitam black topping-ko jakchi akchrake galna man•pilaha. Ia ramako taria matchotani ja 2 ja•manon kosako on•gipa black toppingrang gilprake nosto ong•na, a•bachengaha. Indake ia ramako name tarijani a•sel bang•a manderang neng•nikanirangko chagrongna nangenga” ine AHAM Adokgre Regional Unit-ni President aro Secretary janapataha.
Uni gimin, AHAM ia obostani bidingo ta•raken sing•sandianiko dakchina Skotong Miniater-ko mol•molataha.