Tura, June 22, 2022: World Music Day-ko maniani bak gita Tura-ni MP Agatha K.Sangma Monggolbar salo, Prime Meghalaya aro Durama Association of Music and Arts (DAMA) baksa bakrime ong•atangaha.
Indake Prime Music Incubation-ko WGH a•jani District Auditorium-o oprake on•angaha. Ia manianio a•jani Deputy Commissioner Swapnil Tembe, Dadenggre Civil Sub-Division Officer Vibhor Agarwal, Prime Meghalaya-ni officer-rang aro membor-rang, dingtang dingtang Department-ni Officer-rang bakko ra•angaha.
Ia manianio Agatha Sangma, Music Incubation-o bang•a chadamberangna uamangni changa sapaniko mesokna cholko on•aha. Unbaksana uamangni miksonganirangko chu•sokatna dakchakanirangko on•angaha. Sorkari Launch-pad-ni gita chadamberangni changa sapaniko jinmana mesokangan baksana uamangni ring•anirangko bang•a manderangona sokatna aro nambata gadangko on•anggen ine aganaha.
A•jani Deputy Commissioner Swapnil Tembe rimchaksoani kattarangko aganangaha.
Prime Meghalaya-ni Executive Director Jagdish Chellani aro Program Manager, Flo Hofer-ba jinmana aganprakangaha.
Indake mittelpilani kattarangko DAMA-ni President Shekhar K Sangma aganangskaha.