August 27 tariko Sonaram R.Sangma-ni chang 106-gipa siani salko manianggen
Damra, Aug 25, 2022: Chang 106-gipa Pa Sonaram R.Sangma-ni siani salko August 27 tarik Sonibar salo Damra Bakrapur-o pring 11 bajio manianggen ine Sonaram R.Sangma Memorial Trust Society u•iataha.
Ia salko gisik ra•anio Assam aro Meghalaya a•dokni dal•dalgipa manderang, nangrimgimin NGO-rang, dingtang dingtang Skul aro Kolege-ni chatro chatrirang aro Tura NEHU Campus-ni chatro chatrirang bakko ra•anggen ineba u•iataha.
Indake ia maniako an•saoatna mingsinggipa git ring•rakgipa A•chik chadamberang git ring•a baksana chrok mesae mesokanggen. Uni gimin ia maniaona sakantikon rimchaksoan aro sakantian re•bae bakko ra•epachina, Sonaram R. Sangma Memorial Trust Society-ni President Rakban G.Momin mol•molataha.