Tura, Sept 9, 2022: Association for Democracy and Empowerment (ADE) Apex Committee, Tura tribal jolrango Meghalaya Cabinet-ni CrPC 1973 aro CPC 1908-ko ra•gatnaniko jeagalatan baksa iako ra•gatode, gitcham judiciary system-ko namjabatatgen. Unbaksa Sixth Shedule a•doko tribalrangni chol man•gnirangko komiatgen ine mikkrakataha.
Jatni dingtangmancha dakbewalrang, daka rikanirang, bebe ra•anirang aro gipin dakbewalrangko ja•rikenba Meghalaya a•doko songdongenggipa Garo, Khasi, Jaintia aro gipin tribalrang baksa an•tangtangni mikkim rasongo janggi tangna sika. Uni gimin iako ra•gatanichi mikkangchi neng•nikanirangko chagrongna nangjana gita iako bon•kame ra•chakna skang namedake nichengesa sason ka•enggipa aro warachakenggipa pilak MLA-rang, GHADC, KHADC, JHADC-ni MDC-rang-ko ADE-ni President Dalseng Bira Ch.Momin mol•molataha.
Indakgipa niamko ra•gataniara aiao inmanpilani ong•a, maina saksa tribal Skotong Minister ong•e, Meghalaya a•dokni District Council Court-rang, Village Court-rang, Lasker-rang, Nokmarang, Sordar-rang, Dolirang aro Traditional Head-rang Customary Institution-rangni bilko bilgriatna aro bon•atna sorkari chanchienga ine ADE parakataha.
Uni gimin iani bidingo namedake chanchipilchina ADE pilak MLA-rang, MDC-rangko mol•molangaha.