ADE, skul poraienggipa A•chik chatri saksako so•otanina jegale, duko ga•akgipa Naga nokdangrangna kalimpaaniko parakata
Tura, December 7, 2021: Association for Democracy and Empowerment (ADE) Apex Committee HQ, Tura A•chik chatri saksa jean class X-ni selection porikkako seenggipa dambe me•chikko ka•saninggija so•otako man•ne sianggipa nokdangni manderangna kalimpaaniko parakataha.
Ua me•chik South Garo Hills a•jani Dalu Sub Division-ni ning•o donggipa Chandapara songoni ong•achim. Ua Dalu Govt Higher Secondary Skulo selection test porikkako sena gita December 1 tariko re•angaoni nokona re•bapilgija gimaaha, indake December 4 tarik Sonibar pringosa uni sigimin manggisiko Dangsu A•du buring griponiko man•aha.
Indake skulo poraienggipa me•chik chadambeni kosako ong•gija dake so•ote galaniko aro ia namjabegipa ka•saninggijani kamko ADE jegalatenba dosi dakgiparangko man•adipet ta•rake sandie rim•china aro Fast Track Court-ni ning•o on•china ADE bil gnanggiparangko mol•molataha. Indake A•chik me•chikrangni kosako ong•gija aro kragija kamko songsalo pangnaba nidame dongna man•jawa ine ADE-ni President Dalseng Bira Ch.Momin parakataha.
Unbaksana rasong gribee re•anggipa Sonibar attamo Nagaland a•dokni Mon District-o Armed Forces sipairangni ka•saninggija dos grigipa ramram manderangko goe galanichi duko ga•akenggipa nokdangni manderangna ADE duk ong•e kalimpaaniko parakataha.
Dos gri ramram manderangko ka•saninggija so•otaniko ADE bilaken jegalataha aro ua salko pangnan gisik ra•na gita Nagaland a•doko ‘Black Day’ ine donaha.
Dalseng Bira Ch.Momin-ni janapata gitade, Armed Forces Special Power Act (AFSPA) manderangni namgnina maming kamko ka•ja, indiba democracy a•songon chu•gimik bilko jakkale sason ka•enga. Uni gimin AFSPA-ko NE a•dokokoniko ta•rake ra•galna nanga ine ADE dabiangaha. Indake ong•engon re•baenggipa December 9 tariko NE a•dok gimiko NESO-ni ong•atenggipa jingjengatanio Civil Society baksa ku•monge AFSPA-ko ra•galchina dakgrikanio chakpaaniko on•ne, AFSPA-ko ra•galkuja dipetna apsan dakgrikpagen ine Dalseng Bira Momin parakataha.