Tura, March 8, 2022: Tura Urban Affairs-ni Executive Engineer, Tura songjinmako nitoate tarienggipa pakmarang, krongrang aro sorokrango semikmike sera bera mitchi mitchi dake nosto ka•enga ine “Public Nuisance Act aro Defamation of Public Property Act, 1985”-ni niamo pangchake AHAM-ni kosako Tura Pulis Station-o badi ka•angaha.
Sombar salo Urban Affairs-ni Executive Engineer-ni badi ka•anggipa lekkao janapatani gitade, mande jinmani gam jin ba biaprangko skatang kragija nosto ka•e, nidik nisi sera bera dake songjinmako nitoatna tarienggipa Chandmari kal•chakram biapni bijangchio semikmike nidik nisi ong•siatani gimin, Public Nuisance Act aro Defamation Public Property Act, 1985-ni ning•o pangchake, je organisation dolan Sonibar walo ua janapgimin biapo sera bera nidik nisi semakmakanio jak dongachim, uamangni kosako niam gita raka ja•ku de•angchina see mol•molataha.
Indake je organisation ba dolrang jinmani namgnina aro songjinmako nitoe rakkienggipa biaprango nidik nisi semikmikaniara kraani ong•ja, uni gimin dos dakgipa organisation-ni manderangko sasti on•na nanga ine engineer janapataha.