GSMC, AHAM-ko badi ka•anina jegala, AHAM-na chakpaaniko parakata

0

Tura, March 8, 2022: Garoland State Movement Committee (GSMC) CEC HQ, Tura Urban Affairs-ni Executive Engineer, sombar salo AHAM-ni kosako badi ka•ani gimin raken jegalataha.
GSMC-CEC, HQ Tura-ni Assistant General Secretary, Cyril A.Sangma-ni jegalatani gitade, AHAM-ni Winter Capital-ko Tura-o donchina dabianiara maming namgijani dongja, Winter Capital ko  A•chik a•songni namgninasa dabienga aro A•chik jat gimikni man•gninasa ong•a, AHAM dolsani nangnikani ong•ja. A•chik jatni namgninasa dabienga aro ia dabianiara da•oni ong•ja, skangni A•chik dilgiparangni dabigimin ong•a.
Da•alo AHAM-ni Tura Winter Capital-ko songe on•china dabie signature campaign-ko a•bachengate pakmarango aro sorok rikkamrango sea jotani gimin badi ka•aniara, badita Tura jillako nidik nisie ong•atjok? Ma Chandmari kal•chakram biapko taria dakani giminsa, AHAM-ko matnangenga, matnangode gimikko matnangna nanga aro Tura jillani kona noksik gimikkon nitoatsrangna nanga Chandmari kal•chakramkosan ong•aigija, Uni gimin Tura Urban Affairs-ni Executive Engineer-ni badi ka•aniko GSMC ra•chakna man•ja aro raken jegala.
“Angni sing•anide AHAM-ara badita krorni tarigimin manderangni gam jinko aro boaturangko nosto ka•aha, ia A•chik jatni kam ba ssue-na dabianiora” ine GSMC ni dilgipa sing•doangaha.Da•alo dingtang dingtang silroro namroroanirangko A•chik a•song gimiko baditan nosto ka•aha, iarangko mikron nikjaengama gong kror-ni kror tangkarangko A•chik a•songni gam jinrangko nosto ka•gipa manderangni kosako maina ja•ku de•jaenga aro jrip dongenga ineba Cyril Sangma sing•doangkuaha.
AHAM-ni pakmarango semakmake donaniara badita gong kror tangkarang bon•angjok, uko rong nongpilna hajalan bon•jawa, gong krorni kror A•chik manderangni gam jinrang ba bosturangko nosto ka•giparangni kosakosa ja•ku de•na nanga. AHAM-ni dabianiara maming gualani dongja, A•chik jat aro A•chik a•songo songdonggiparang gimikni namgninasa dabiani ong•a.
Uni gimin AHAM dolsa mangmangko kal•ake chonnikani ong•ja, indiba A•chik jat gimikkosa chonnikani aro mikchepani ong•enga. Indake jatko chonnike aro onchepe roaniko ra•chakna man•jawa ine GSMC raken jegalataha.
Tura Urban Affairs-ni Executive Engineer, Tura jillako nitoe tariako semakmake michiatenga ine AHAM-ni kosako badi ka•ani gimin mikkangchiba ia Winter Capital-ko dabianiko dontongaignok ine chanchiama, dongjawa batesa rakbate aro bilakbate A•chik jatni namgnina dabiangkugen. Uni gimin GSMC-ni gitaba AHAM-na chu•gimik chakpaaniko on•atenga, A•chik jatna dabianio pangnan ku•cholsan ku•mong nangrime ku•rang on•anggen aro ja•ku de•angpagen ine Cyril Sangma parakataha.

Leave A Reply

Your email address will not be published.