Tura,March 4,2022: A•chik Holistic Awakening Movement (AHAM) dolni President Pa Georgeprince Cheran Momin, sukrobar salni bak o a•dokni Skotong Minister Pa Conrad Sangma na memorandum ko seenba Tura jilla o Winter Capital-ko tarake songe on•china janapataha.
AHAM ni dabianio Winter Capital ba Meghalaya a•dokni sin•kario headquarter ko Tura o songchina dabiani maming gital dabiani ong•ja ineba ua agandapaha.
“Meghalaya a•dokna dakgrikmitingo Hill State Movement ni dilgiparang skangon Shillong o jadok aro Tura o jadok dake headquarter ko songgen ine songgigrikaniko dakaha indioba a•dok bilsi 50 ong•pilona kingkingba ia ku•rachakniko be•en pil•atkujani gimin A•chik jat aro Garo hills o donggipa pilak jatrang ma•ringtokengaha” ine AHAM ni President Pa Georgeprince Cheran Momin u•iataha.
Tura o Winter Capital ko su•songani A•chik jatnasan ong•aigija indiba a•dokni pilak jatrangan namgniko man•gen,maina Winter Capital ko Tura o su•songode bang•a sorkarini kamrangba nakatdapgen aro kamgri dongenggipa a•dokni chadamberangba ua cholko ra•na gita man•gen.Unbaksana, namgipa democracy-na nama governance aro development administrative units rangko pilak biaprangona sokatna nanga aro Turao Winter Capital-ko su•songaniara governance ni policy ge•sa ong•a.Tura o Governor House ko Governor Guest House ine mingjitanikoba AHAM raken jegala.Winter Capital A•chik jatna ku•rachakgimin aro on•na nangtelgipa ge•sa ku•rachakgimin boksis gita chacha ong•a ine AHAM ni President George Prince agantalataha.
Winter Capital ko Turao senggnang su•songjaode AHAM Garo Hills ni dingtang dingtang bakrango jingjengatanirangko ongatanggen ine ka•mikenatani kattakoba aganaha.
AHAM dol mija February jani 26 tarikoni Tura o Winter Capital ko su•songna gita Signature Campaign koba a•bachengataha.