Tura, April 26, 2023: A•chik Association for the Protection of Environment (AAPE) Central Governing Body (CGB) Tura, Garobadha-oni adita km chel•ao donggipa, Selsella block-ni ning•o ga•akgipa Dokagre songo niam gri chalaienggipa bol ratani kor ba saw mill-ko dolgittam NGO-rang jekai AAPE, Federation for A∙chik Freedom (FAF) aro Niksamso Garo Community Organisation (NGCO) ri∙menba State Forest Department-na pakwatataha ine u•iataha.
Indake niamni a•palo bol ratani karkanako chalaie, A∙chik A∙songni bol-wa∙arangko pale cha•engani a•sel, buringo dongenggipa matburingrangna dongchakani biaprang dongjaengaha aro unbaksana chiring chibisikrang tipangenga. Uni gimin iarangko an∙ching sakantian champengna raken ja•kuko de•na nangengjok.
“An•ching sakantian mikangchina chanchie, NGO-rang, Forest Department mangmangko nichakaigija, an∙ching antangtangba miksonga gnang indake niamni a•palo bol wa∙arangko nosto ka•e galaniko bon•atna ku•cholsan ong•e kamrangko ka•na A∙chik jat sakantikon mol•molatna sika” ine ASPE-ni Organising Seretary Challang Momin ku•mongataha.
Uandake A∙chik A∙songo skatang niam gri saw-mill kuligiparangko chipatna raken ja∙ku de∙anggen aro minggipin A∙chik A∙songoniko sriksrik bol wa∙arangko Assam adokona niam gri ra∙angiparangko raken champengatenga, An∙ching sakantian ma∙sia bol wa∙arang bon•angani gimin uko warachakna, hai an•ching ku•cholsan ong∙e kamko ka•angna ine FAF-ni Finance Secretary Bipin M. Sangma H.Q. Tura, ku•mongatskaha.