Ranikor, April 19, 2023: All Khasi Hills A•chik Federation (AKHAF) HQ. Shillong, South West Khasi Hills a•jao donggipa Bagli songoni Moheshkola songona tarienggipa CWPD Project-ko sing•sandiangaha.
Sing•sandianio ma•siani gitade, Bagli songoni Moheshkola songona tarienggipa ramako Dilip Paul & Sons Company-na contract on•aha. Indake uamangni tarienggipa ramarangko re•ange sing•sandion, company-ni manderang kamtangko name ka•jaenga ine nikna man•aha ine koborna parakataha.
“CPWD project sima ari jolo dongenggipa manderangna namen dakchakanirangko on•achim. Indiba ia rama Military Personnel aro Border Safety Force(BSF)-rangna namen gamchatbegipa rama ong•a. Indiba Dillip Paul & Sons Company, manderangna ia ramako niam gita tarie on•jaenga. Una agreba, uamangni tarienggipa black topping rama name mangrakja. Indake kamrangko ka•ani a•sel ramako baiatja aro nosto ong•atenga” ine AKHAF-ni General Secretary Clivestar Ch Marak parakataha.
Ramarangko name tarijani a•sel wilwilao songdongenggipa manderangna aro BSF sipairangna namen neng•nikaniko on•enga. Uni gimin, “Chinga AKHAF ia kamko raken jegala aro kamrangko name ka•jagenchimode, chubata gadango kam ka•enggipa bil gnanggipa Officer-rangna badi ka•doanggen” ine mikkrakataniko on•ataha.