Tura, April 19, 2023:Tura Jangga Wadanang-o donggipa Jio Tower service namjani a•sel gittimni manderang neng•nikaniko man•enga ine Jangga Development Committee (JDC) koborna u•iataha.
JDC-ni koborna u•iatani gitade, Jangga-o donggipa jio tower song jatchio ong•genchimoba, jio service namjani a•sel call ka•na aro internet jakkkalna gita man•gija donga jagni ba jagittam mang ong•pilaha ine u•iataha.
“Chinga changni chang Jio Service Provider-na kobor on•atahachim, indiba da•alona kingking knachakja aro ia tower mamingnaba choligija ro•ongko songe donaming apsanaia. Bijoli dongjaoba power generator-ko jakkalja. Uni gimin gittimni manderangko cha•boke cha•aming apsanaia aro indirect dakaito ga•aka, maina chinga ia jio service-ko jakkalengon, indin jakkalaja, tangkatangko gamesa topup-rangko ka•e aro bill-rangko gamesa jakkalenga. Uni gimin manderangna name service-ko on•na nanga. Ong•jaode, chinga mikkangchi raken ja•ku de•anggen” ine Jangga Development Committee mikkrakataniko on•ataha.