Tura, April 7, 2023:Kobor man•soani gitade, Meghalaya Pulis saksa Mallangkona Bolsung songni Pa Darwin Marak gimaenga. Ua Jaintia Hills a•jani Saipong Pulis Station-o kam ka•engachim. Darwin Marak re•anggipa March 25 tarik Sonibal attamo Saipong Pulis Station-oni ong•katangaha aro da•onaba re•bapilkuja ine u•iataha.
Ua kamona re•bajani gimin, Saipong Pulis Station-ni Officer, uni jikgipana Call ka•e sing•aton, nokona re•baa dongja ine jikgipa aganataha. Darwin Marak-na call ka•oba, man•jaha. Ua bano mai a•sel ong•aha, darangba ma•sina man•kuja.
Uni gimin Darwin Marak-ko saoba, badiaba biapo nika ong•ode, ia Mobile No. 8811022397 aro 9365776866-ona call ka•e u•iatpachina gita Darwin Marak-ni ma•drang Mahari mol•molataha.