Kharkutta, Mar 17, 2023: North Garo Hills a•jani Kharkutta, sepango donggipa Chotcholja songni Ma Ledya N.Arengh-ni saksakamkam demechik Miksera N.Arengh re•anggipa March 12 tarikni attam 6 bajio nokoni sruk katangha ine koborna u•iataha.
Ma Ledya N.Arengh-ni kobor ra•timgiparangna ku•silitingo aganatani gitade, Miksera N.Arengh segipa ra•ani ru•utkujachim, uni segipa Dalu-oni ong•achim, indiba ua an•tangni ka•sagipa ma•gipa aro segipako gale katangaha.
Maini gimin ua an•tangni ma•gipa aro segipako gale katangaha. Ma•gipani aganata gitade, ua sakgipin me•asako michana nanga ineba chanchichipenga.
Miksera Arengh-ko nokdangni manderang dingtang dingtang biaprangona kobor on•ate, sandianiko dakenga, indiba da•alona kingking maming koborko man•kuja. Uni gimin saoba badiaba songo ba gittimo nikode, ka•mao on•atenggipa phone number-o call ka•e u•iatpachina mol•molatenga.
Ua me•chikni ka•bako Aski aro jakasini jakpa janggilo Chisol-ko tattu su•a donga ineba u•iataha.
Miksera Arengh-ko badiaba biaprango nikode, ia ma•gipani phone number 9233852763-o call ka•e u•iatpachina sakantikon mol•molataha.