NGCO, Southern Zone Baghmara super market bus stand aro ramako tarichina dabia

Baghmara, Mar 17, 2023: Niksamso Garo Community Organisation (NGCO) Southern Zone Baghmara, Sukrobar salo South Garo Hills a•jani Deputy Commissioner-ko gronge, uamangni dabie segipa lekkako on•angaha.

NGCO Southern Zone-ni nangnike, DC-na lekka seatani miksongara, Baghmara Municipal Office mikkango donggipa bus aro sumo stand aro Baghmara Super Market ramako ta•rake tarichina mol•molangaha.

Ru•uta bilsirangna Baghmara Super Market-o donggipa bus aro sumo stand-ko tarigija galchipe donani gimin NGCO Southern Zone-ni President Arjun S.Marak suk ong•gijaniko parakataha.

Uni gimin, kosako janapgimin Baghmara Municipal Office mikkango donggipa Bus aro Sumo Stand aro Baghmara Super Market ramako ta•rake tarichina NGCO Southern Zone, Baghmara dabiangaha.

Baghmara Super Market rama namjani a•sel wachini somoio manderang namen neng•nikaniko man•enga. Ia rama aro Super Market Baghmara town jatchio ong•ani gimin, ta•rake tarina nangchongmota ineba dabiangaha.