Tura, Mar 17, 2023: Azadi Ka Amrut Mahotsav’-ni bak gita salgnina Tura District Auditorium-o ong•atenggipa photo exhibition-ko Bristibar salo, West Garo Hills a•jani Deputy Commissioner Swapnil Tembe, Jengjal BSF CO 100-ni Commandant Ajai Tiwari aro gipin DDK, DIPR-ni Official-rang, Tura Govt College-ni skigiparang aro chatro-chatrirangni dongpanio a•bachengate on•angaha.
Ia photo exhibition-ko India Sorkari, Information & Broadcasting Ministry-ni ning•o donggipa Tura Field Office-ni gita ong•atenga ine u•iataha.
Ia photo exhibition-o India a•songni jakgitelanina krengdilanggipa pagitcham ma•gitchamrangni noksarang aro a•songko chel•chakgipa sipai kotokrangni jakkalanggipa silchi-darerangko manderangna mesokangjolaha.
Indake ia photo exhibition-ko a•bachengate, on•ani salo West Garo Hills a•jani Deputy Commissioner Swapnil Tembe, jinmana aganprakengon, India a•songko jakgitel ong•atna an•tangtangko on•kange dakgrikdilanggipa aro janggitangko gimaatanggipa pagitchamrangni kamrangko gisik ra•atpile, uamangni dakmesokanggipa kamrangko pangnan gisik ra•angchina aro daksningchina manderangko didiangaha.