Tura, February 20, 2023: South Tura-ni TMC candidate Richard M Marak, NPP-chi chalaigipa MDA sorkarini kamrangko Press Conference-o parakataha.
“TMC dol mangmangsan BJP dolko warachakna ka•donggipa. Chinga TMC-ni dilgiparang an•chingni jatna, a•dokna nama kamrangko ra•bana aro ka•na miksonga. Chinga a•songni 8-gipa schedule-o A•chik aro Khasi ku•sikko segatchina rakbee kamrangko ka•enga. An•chingni dilgiparang changni chang Meghalaya a•dokna namgniko ra•bana ku•rangko on•an baksana ja•kuba de•enga” ine Richard Marak aganaha.
Ia Press Conference-ko TMC WGH-ni Co-ordinator Sapford N Sangma, South Tura Block President Ajay Marak, General Secretary Chenny Tasha D Marak aro Joint Secretary Stephen Marak dongpae bakko ra•angaha.
A•jani skul nokrangko taridapgija galchipe donengako nike, South Tura Candidate Richard Marak, “Batanggimin 2018 bilsio Conrad Sangma lekka porako skanggipao donne kam ka•gen ine manderangchiko vote gilamaha. Indiba ua elakkatangon skul nokrangko taridape on•ja. Elakka-ni bang•a skul nokrangan nosto ong•aha. Poraienggipa chatro chatrirangko Dobasipara-o donggipa Community Center buildingosa skie on•enga” ine aganaha.
Tura songjinmao City bus mangmangba dongja, skotong minister Conrad Sangma an•tangni elakkako maina galchipa ineba sing•doangaha.
“Chinga TMC-ni dilgiparang nama miksonganio re•mikkange kamrangko ka•enga. Batanggipa bilsi 5-ni gisepo a•dokni corruption-ko nikbataha. Corruption-ko aganode, salsana matchotjawa, jasarang nanggen. A•dokni Department ge•antion corruption gnang. Chinga ia corruption-rangko jegalaniko ma•mongona sokatna rake kamrangko ka•aha. Chingni manifesto-o ming 10 ku•mikchetanirang gnang jekon chinga a•dokni manderangna dangdike on•gen” ine Richard Marak Conference-o aganaha.