Conrad Sangma TMC aro BJP-ni chu•gimik bimingko talata  

0

Tura, Feb 21, 2023:NPP-ni padot aro Skotong Minister Pa Conrad K.Sangma, Monggolbar salo an•tangni South Tura elakkao donggipa Sampalgre, Matchikol, Captain Reserve gittimrango campaign ka•ani ja•man, Rangsakona elakkaona re•ange, Rangsakona elakjao susaenggipa NPP candidate Subir M.Marak-na Rangatari sepango donggipa Nirupama Memorial Skul field-o campain ka•angaha.

Pa Sangma an•tangan NPP-ni padot ong•e, ia election-o NPP candidate-rangko cheatna a•dok gimiko wenroroe campaign-rangko ka•engon, MDA sorkarini bang•a chu•sokatgiminrangko talate on•angaha.

Pa Sangma-ni agana gita darang sorkariba MDA sorkari gita a•dokna bang•bate namroro silroroanirangko ra•bagipa dongja. MDA sorkari bilsi 5-o a•dokna bang•a dingtanganiko ra•baha. Batanggimin sorkarirang bilsi 5-na skang Tura-ko galchipaha, indiba jensalo MDA-ko 2018 bilsioni rikna a•bachengaha, Tura namen dingtanganiko man•aha ineba aganangaha.

Pa Sangma Rangsakona elakkao tom•aniko ong•ate, jinmana aganprakengon, ia electiono namgipa party-ni candidate-ko seoke, mikkangchi apsan ku•monge kamrangko ka•angna sakantiko sakantiko mol•molangaha.

“Na•simang ma•sia, anga maming saloba gipinko chonnike, aganrongja. TMC-ni MLA-rang ambinode katelaigen, uni gimin anga Mamata Banerjee-na aganatna sikenga. Na•simangni tangka paisarangko koros ka•nabejok orto dongja, iarangde kattelaigen. Uni gimin manderangba jechakna nanggen, knalo indakgipa MLA-rang aro dilgiparangna vote on•ne maming orto dongja. Uamang dolsa dolgipinona katjojoe, an•tangtangni namgnina, manderangni gimin chanchigija kamko ka•enga. Da•alo anga kusi ong•a, Subir Marak na•simangna an•tangni miksonganirangko talatjok. Ua da•alo bilna aro tangka paisana mikboke politics-o napenga ong•ja” ine NPP president aganangaha.

Rangsakona jolo chu•onga gita development dongkujaenga, hospital-rang chu•ongkujaenga, pulisrangko nangkuenga, iarangko nike Subir Marak politics-o napenga. Ua da•alo na•simangni ka•saachi MLA man•ode, ua an•tangni dormahako ra•gija kangal cholgrirangna koros ka•gen, bano indakgipa dilgipako man•gen. Indake manderangna kakket ka•sae chakatenggipa candidate-ko na•simang man•jawa. Uni gimin Rangsakon-ni manderang indakgipa candidat-na ba party-na vote-ko on•jaode, bilsi 5 neng•nikaniko man•gen.

“Angni campaign ka•na re•ango, anga inteligence department-ni manderang baksa golpomittingo TMC aro BJP-ni partnership ong•ani gimin aganaha, da•alo bisongni kobor man•a gitade, TMC party-de ambino je seatrango MLA man•gen, BJP-chi napna tik ka•jokna. BJP baksa bakrimgnokna, uni gimin anga da•alo TMC-ni dilgiparangna aganatna sikenga, TMC-ni candidate-rangna chakpae orto dongja. Mamata Banerjee aro Abishek Banerjee, baditaba chang chanchina nanggen. Da•alo uamangna chake MLA ong•atoba, iarangde katna tik ka•manjok” ineba Conrad Sangma aganaha.

“NPP-san dongaigen, maina NPP-ni head-quarter Meghalaya-an ong•a. NPP-ni national president ‘Babang’ san ong•aigen, uni gimin NPP-de darangchiba re•angjawa, na•simang baksa pangnan dongkame na•simangna dakchakgen aro kam ka•gen. Ia dal•dalgipa party-ni dilgiparang, bilsi 5 prako election ong•osa campaign ka•na re•baaigen. Election matchotani ja•mande, Garo Hills-o ba Meghalaya-o maiba obosta ong•oba ia dilgiparang re•bajawa. Neng•nikani somoio na•simangna dakchakna aro kam ka•nagipade, Subir Marak aro Conrad Sangma-san ong•aigen. Uni gimin an•ching name chanchiesa, kam ka•na na•simang sakantiko mol•molna sikenga. Da•alo TMC-ni dilgipa West Bengal-ni aro BJP-ni dilgiparangba Delhi-onisa ong•a, maiba neng•nikani ong•ode West Bengal-oni Garo Hills-ona sokbajawa, Delhi-oniba re•bajawa” ine Conrad Sangma agan talatangaha.

Leave A Reply

Your email address will not be published.