Tura, Jan 27, 2023: West Garo Hills a•jani Gambegre block-ni ning•o donggipa Chenggapara songo chang 74-gipa Republic Day-ko maniangaha.
Ia chang 74-gipa Republic Day-ko Chenggapara Republic Day Celebration Committee ong•atangaha.
Indake, ia Republic Day-ko maniaona GSMC, HQ-ni Additional General Secretary aro Chenggapara Republic Day Celebration Committee-ni General Secretary Bostone M Sangma mongsonggipa sokgipa ong•e bakko ra•angaha.
Bostone Sangma mongsonggipa sokgipa ong•e, tom•anio jinmana aganangengon, pilak India-ni Constitution ba Niamrang aro Jakgitelani kattarangko aganne, pilak jat aro ma•malrang baksa apsan meli nangrime janggi tangani gimin aganangaha.
India a•songni Niamrangko 1950 bilsini January 26 tariko parakatanina namen katchabeani sal ong•a. Uni gimin India-ni dongimin Niamko ja•rike janggi tangna ine sakantikon ku•mongaha.
India-ni dongimin Niamranga mongsongbate Justice, Liberty, Equality, Fraternity ong•a aro iarangni gamchataniko Bostone Sangma manderangna talate on•angaha.Uni gimin ia January 26 tarikara sakantina namen gamchatgipa sal ong•a ineba aganangaha.
Ia kusi ong•ani salko maniengon, Chenggapara kal•chakram biapo robol kal•susaaniko ong•atangjolaha. Ia kal•susaanio Dopogre baksa Chenggapara FC kal•susaangaha, indake robol kal•susaanio Dopogre chegipa ong•aha, Chenggapara FC gnigipa ong•skaha ine Bostone Sangma u•iataha.