Shillong, Jan 27, 2023: Health Department pilak nanggipa cholrangko aro daka-rikanirangko on•an baksana dingtangmancha skiako man•gimin manderangko kamo rakkianichi a•doko mortality rate, ba manderangni sabisirangko man•e sianirang 9% komiaha ine Health Minister James Sangma aganaha.
James Sangmani indake agananiara, Meghalayao MMR aro IMR namen bang•achim maina bang•a ma•giparang aro bi•sarangan batanggimin salrango dingtang dingtang neng•nikanirang jekai cha•ani-ringani chu•onggijani aro uandake gipin a•selrangchi janggi galahachim.
Sianirangko komiatna man•anina Sangma an•tangni kusi ong•aniko parakataha aro da•o hajalni hajal an•o kegipa ma•giparang kengni gri bilakgipa an•senggipa bi•sarangko an•pakna man•engaha ine aganaha.
“Una agreba bang•a atchidaldal bi•sarang chu•onga gita be•enna namgipa cha•ani-ringanirangko man•enga aro uandaken Infant Mortality Rateko 21%ona tang•onataha. Da•alona kingking lak 2na ma•giparangna baten chingni programrangoni aro schemerangoni namgnirangko man•aha. Da•alo an•chingni bi•sarangoni 91% kengnigipa sabisirangoni naljokaniko man•aha, aro indake ong•aniara a•songo bang•a a•dokrangoni chu•sokatkugijagipa kam ong•a,” ine ua aganaha.
Namgipa aro kororsrangni gita amchakgipa sanna-banani cholrangko on•anian MDA sorkari dakna nangchongmotgipa ong•a ine aganengon, namgipa an•seng-baljokani aro koros amchakgipa sanna-banani aro pilakonan sokatna amgipa cholrangara ru•uta somoirangna Meghalayao mingramramaigipa kattarangsan ong•aiachim maina sagipa manderang sorkarini mamung dakchakani donggijani a•selo an•tango donggipa tangka-paisarangko jakkaleba chu•onga gita sanna-bananirangko dakna man•jae kangal cha•siaona soka ine Sangma aganaha.
Sangmani janapani gitade, Sorkari an•seng-baljokanio neng•nikanirangko namatna kang•kare kae kamko ka•aha aro a•dokni skotong ministerni dilanichi bang•a kamrangko a•bachengataha jechin Meghalayani healthcare systemo namdapanirangko nikna gita man•enga.
Chingni skanggipa dakna miksongchenggiparangoni mingsara sanna-banani cholrangko koros amchakatna gita ong•a, jeni a•selan batanggimin salrango songo-noko songdonggipa manderang aro tangka-paisani gita bilakgijagipa kangal-cholgri manderang bang•a neng•nikanirangko man•ahachim. Sorkari ia kamrangna tangkarangko chamrikrike, 2022 bilsio chinga health insurance coverageko MHISni ning•ao a•doko donggipa sakprakna lak 5,30,000ona bariatna man•aha”, ine ua aganaha.
Uamangni sorkari a•dokni an•seng-baljokani cholrangna dingtanganiko ta•raken ra•bana man•aha, mongsongbate ua biaprango jerangon nangchongmotgipa clinic ge•samangba dongja ine janape, ua West Garo Hills a•jani Jengjalo manderang samrangko ra•na aro sanna-bananiko dakna chel•e songrena nangachim indiba Jengjal Subsivision Hospitalko a•bachengataha jeonan Christian Medical College (CMC) Velloreoni namen u•i-ma•sigipa aro skia man•gipa doctorrang re•baenga aro uandaken Ian Garo Hills gimiko sorkarini nambatgipa hospitalrangoni damsa ong•enga ine ua aganaha.
Baljek Integrated Health Complexo uamang palang ge 100 donggipa sanchakramko dakna man•aha jeon nambata gadango aro dingtangmancha simsak-nirokaniko dakna cholrang donga ine janape, sorkaro a•dokni dingtang dingtang biaprangko dam 2000mang health centre ba sanchakram biaprangko tarina aro namdapatna gita krenge kamrangko ka•enga jedakode je songni je mandeba sanna-banani cholrang donggijani a•selo neng•nikaniko chagrongna nangjawa ine ua aganaha.
Una agreba a•dokni diltugipa biaprango donggipa songrangonaba da•o sanna-banani cholrangko sokatna man•aha maina Health Department a•dok gimikon teleconsultation clinicrangko a•bachengataha jedakode chel•ao aro diltugipa songrango donggipa manderang chel•e songree sanna-bananina sing•sandianirangko dakna nangjawa ineba ua agandapaha.
“Da•alo chinha a•dokni dingtang dingtang biaprango dam 80,000 iandakgipa clinicrangko a•bachengatna man•aha. Apsan somoion, chu•gimik kam ka•na gita aro samrang aro gipin sanna-bananio nanggipa bosturangko iandakgipa diltugipa songrangona somoi gita sokatna cholrangko bikotaha. Indake dakanichi an•chingni a•dok samrangko sokatna dronerangko jakkalchenggipa a•dokrangoni damsa ong•aha,” ine ua aganaha.
Batanggimin bilsi 5o an•seng-baljokanio a•dok namen re•enga aro iani giminan Meghalayana ma•mongoni, international organisationrangoni aro gipin dal•dalgipa dolrangoni boksisrangko on•aha ine aganaha.