Tura, Dec 23, 2022: Re•baenggipa 2023 bilsini Assembly Eleksino Independent candidate ong•e, 59-Chokpot elakkao susaenggipa Novembirth Ch.Marak, Chokpot elakkani ning•o donggipa bang•a songni manderangna Krismas damarangko Bristibar salo suale on•angaha.
Novembirth Ch.Marak skanggipa changna Chokpot elakkao bilakgipa dolgittam political party-rang jekai NPP, GNC, TMC aro Congress candidate-rang baksa bilsue susaangna an•tangko tarisoenga ine koborna u•iataha.
Meghalaya a•dokko man•chengaoni da•o bilsi 50 gapahaoba, Chokpot jolrango maming namroro silroroani dongkuja. Bang•a political dolni MLA-rang aro MDC-rang indita bilsina kingking galchipe donani a•sel, Chokpot jolrango gimikni gitan ja•man chakaniko man•enga. Uni a•sel songni manderang namen neng•nikaniko man•tokenga ine nikna man•aha. Chokpot jolrango neng•nikaniranga mongsongbate re•a doani rama jal•lang, skie ra•ani skul aro kolej-rang, sanna banani hospital-rang chu•ongjani gimin manderangni janggi tanganio namen neng•nikako chagrongenga.
Uandakgipa neng•nikanirangko Novembirth Marak nike, A•chik jatna aro Meghalaya a•dokni manderangna dangdike on•na, chanchie re•anggipa 2021 bilsini January jao Chokpot jolni manderangko gronge agan chanchirimaniko dakahaon, songni manderang, uni miksonganiko namnike, unbaksa ku•monge kamko ka•na a•bachengaha ine Novembirth Marak koborna parakataha.
Indake bilsignina kingking Novembirth Marak songni manderang baksa ku•monge kamko ka•na re•ongkataha.
“Angni Chokpot elakkao susaengon, gipin-ni mipalko ra•sekna, sakgipinko chonnikna, sakgipin-ni kamko jaksi otna aro sakgipinko matnangna susaja. Indiba A•chik jatni ong•sianiko nike, maiko dakode anga uamangko dakchakna man•gen, ia miksonganiosa, jatna dangdike on•pana sike Chokpot elakkao susaenga. Anga da•o MLA ong•na skangan Dildora English skul ge 5-ko kulie on•na miksongenga. Jedakode, skia man•gipa chadamberang ia skulrango skigipa ong•e, janggi tangpana chol ong•gen. Manderang angko MLA seokgenchimode, dingtang dingtang janggi tangani cholrangko ra•bana anga miksongenga. Anga MLA man•jaoba angni bil amadipet dangdike on•gen. Chokpot jolo nangbatgiparanga re•a doani rama jal•lang, chubata gadango skie ra•ani bidamong ba kolej aro hospital iarangko skanggipa mikkango donne kamrangko ka•anggen” ine Novembirth Marak janapataha.