Shillong, December 22, 2022: Meghalaya a•dokni Sports & Youth Affairs Department baksa Meghalaya State Olympic Association (MSOA) aro Meghalaya Athletic Association bakrime Sohra International Half Marathon-ko skanggipa changna Budbar pringni 7 bajioni 11 bajiona ong•atangaha ine u•ataha.
Sohra jean nitogipa chidare aro nitogipa biaprangna mingsing minggamachim, ua songni ramarango Marathon-ko katenggipa manderangna an•saoniko on•aha ineba janapataha.
Half Marathon-ko Laitsohpliah songoni Mawsmai Nohsngthiang Falls View Point-ona km 6 mang ong•achim, ua biapona katataha. Ia marathon-ko bak 4 dake, Elite me•a aro me•chik (21K), Meghalaya PRC me•a aro me•chik (21K), bilsi 50 batgipa me•a aro me•chikrang kusina katani ba run for fun (5K) suale ong•atangaha.
Ia katsusaanio sak 750 manderang bakko ra•angaha, unbaksana a•gilsakni kona noksikoni sak 4 manderangba re•bae bakko ra•angaha.
Elite Me•a 21K Category-o Ethiopia-ni Adisu Bekele Abebe cheaha, uandake Elite Me•chik 21K Category-o India a•songni Richa Bhaduria cheangskaha. Meghalaya a•dokni Skhemlang Suba aro Kyntimon Marwein PRC Me•a aro me•chik category-o cheskaha.
Ia katsusaanio chegiparangna boksisrangko aro bakko ra•anina Health and Family Welfare Department-ni Principal Secretary, Sampath Kumar mongsonggipa sokgipa ong•e suale on•angan baksa de•mittele aganangaha. Meghalaya a•dokni Sports and Youth Affairs-ni Director, Shivansh Awasthi aro Meghalaya State Olympic Association-ni President John S Kharshing Guest of Honour ong•e sokangaha.
Meghalaya State Olympic Association-ni General Secretary Finely Pariat, Sohra International Half Marathon-ko bilsianti ong•atanggen ine aganangaha.