Tura, Dec 3, 2022: South Tura elakkao donggipa Lower Nikseng Gittimo rama gital tarina jolni manderang a·atangtangko wate on•aha aro jerangan rama rikamo nok rike dongengachim, uamangna rama tarie on•gen ine ku•rachakahachim.
Indiba da•ona kingkingba rama tarie on•kujaenga, gittimni manderang noktangtangona re•angna rama dongjani gimin dukko man•enga ine kobor ra•timgiparangna u•iataha. Indita chugipa biapko bolni jang•ke tarie rama re·enga ine gittimni manderang suk ong•gijaniko parakataha.
Rama gital cho·e tarigipako roller-chi jetgija tariani gimin gittimni “ma•gipa saksa gipin biapo rama tarigiparangde a·a gital cho•e chi rujipjipe roller-chi jetchengesa tariachim, indiba chingni ramakode rama pujole an·cheng puripripe block anjolaia aro ia rama CM-ni nokoni chel•ja metre 100 mangsan ong•aia” ine aganaha.
Uni gimin gittimni manderang ramako tarion name tarichina contractor Sanjay Saha-na aganaha, indiba contractor manderangni aganako knachakgija, batesa uamangko dagrange, “CM-ba angni ripeng aro SP-ba angni ripengsa, anga ia ramako name tarioba aro tarigija dontongoba na•song angko mai dakgen” ine Sanjay Saha gittimni manderangko dagrangaha ineba u•iataha.
Ia obosta ong•ani gimin, Social Activist saksa dilgipa saksana badi ka·ahani gimin, rama tarigipako re•ange block ge•sako jakchi bikote ja·achi ga·e nion naptomaha.
Uni gimin saksa dilgipa baksa Lower Nikseng Gittimni manderang, PWD-ni Engineer Sanjeev K Marak-ko gronge aganon ia ramako contractor name taripilna nangen aro tarigimin ramako changsa taritaigen ine aganaha, “angaba da•ororo office-o kam jakchakjae re•ange nina gita somoi choljokjaenga, jensalo ua ramako anga re•ange nipiltaikujana dontonchenganiko dakkugen, indiba Contractor na•simangni ramako name tarie on•pilna nangchongmotgen” ine aganataha.