Rongrong MDC Thapa, Chidaret dollong aro Resubelpara Civil Hospital-ko niea

Resubelpara, December 8, 2021:North Garo Hills a•jani Rongrong MDC Rinaldo K. Sangma, Monggolbar salo Thapa, Chidaret dollong aro Chidaret-o pallang ge 100-ko rikenggipa Resubelpara Civil Hospital-ko rikani namen ka•sinengani gimin nina re•angaha.

Rinaldo Marak dollong rikenggipa biapona re•ange Engineer-rang aro expert-rang baksa agangrikengon, uni ma•siani gitade Thapa, Chidaret dollongko rikani project-ko namedake nipiltaina nanga, maina da•o rikenggipa plan namen dingtanga aro baikamgipa ong•jawa ja•mano songni manderangna neng•nikani ong•chongmotgen ine aganaha.

Dollongni bakroa plan gitade miter 120 bakrodapatna nangenga, songdogimin krongrang aro retaining wall-rang Damring chibimani bon•chote jokanggipao ga•akea, jekon chi bana re•ani somoio altue man•pakanggen. “Uni gimin anga department-ni Engineer-rang songgimin dollongni krongrangko niroke mongsonggipa kamrangko namatchina mol•molna sika, jedakode mikkangchi neng•nikaniko man•jawa” ine Rongrong MDC aganangaha.

Chidaret-o pallang ge 100-ko rikenggipa Resubelpara Civil Hospital-ko rikani indita sal somoirangna ru•utate donaniko niangani ja•mano contractor-rang aro overser-rangko sandie, “Anga ma•sia ia mongsonggipa civil hoapital building nok aro kam ka•giparangna dongchakani quarter ba nokrangko rikna gita 2018 bilsio tangka paisarangko chamataha aro tangkarangko okna gita skanggipa bill-rangko uamang sorkarina on•manaha. Indiba kam ka•anirang namen ka•sinenga. Ia nokko rika 50% percent-de tang•doaha, indiba kam ka•aniko bilsisang donchipaha” ineba Rinaldo Sangma janapataha.

Indake ong•engon, kosako janapatgimin kamrangni bidingo Skotong Minister aro a•dok sorkari department-ni manderang ia neng•nikanirangko jinmani namgnina ta•rake nirokatpachina Rongrong MDC mol•molataha.