Tura, December 8, 2021: Federation of Khasi Jaintia and Garo People (FKJGP) Garo Hills Zone, Butbar salo SBI-ni Banking Examination Centre-ko Garo Hills-o ra•gatchina dabie SBI-ni Regional Branch Manager-na lekka see Regional Business Office, Tura Chandmari-o on•angaha.
SBI-ni ong•atenggipa bank-ni dingtang dingtang kamrangna dorgasto galna aro porikka seanio Garo Hills-ni chadamberang namen neng•nikaniko chagrongenga ine FKJGP janapataha.
India gimikon SBI, bank-san mongsonggipa ong•aia, uni gimin Salgro Salaram a•dokni bang•a dingtang dingtang a•jarango SBI branch-rangko bariataha aro gipin bank-rangni gisepo ge•sa mongsonggipa aro manderangni ma•sibatgipa SBI bank ong•a. Apsan dake Indiani gipin bakrango SBI-ko ma•sian baksa Meghalaya a•dok gimiko aro Garo Hills-oba SBI branch-rangan ge•sa mongsongbatgipa ong•enga.
Uni gimin SBI-o bang•a kam ka•giparang jemangan banking system-ni gimin ma•sitokachim, SBI-o bang•a kam ka•giparangko nangdapengani gimin bilsianti SBI-o kamni kobor-rangko advertisement ka•e parakatna nanga. SBI-o vacant postrang dongode kobor-rangko SBI branch-rang gita uamangni Official website-o ba branch ge•antio u•iatna nanga ine FKJGP dabiangaha. Garo Hills-oni candidaterang uandakgipa postrangna kragiparang bang•en donga. Meghalaya a•doko SBI Banking Exam Centre-rang ge•gni mangmangsan dongaia, ge•sa Shillong Bara bajaro ‘on digital zone’, ge•gipin Shillong ‘Ramakrishna Mission’ ong•a. Uni gimin Garo Hills-oni kamna galatenggiparang SBI Banking Exam Centre, Garo Hills-o dongjani a•sel namen neng•nikaniko chagrongna nangenga ine FKJGP parakataha.
FKJGP, Garo Hills Zone-ni General Secretary Raksrang A.Sangma-ni parakatani gitade, indakgipa kamrangna galatenggipa Garo Hills-ni chadamberang porikka sena chel•begipa biapona songreangna nangani a•sel bang•abata candidaterangan tangka paisana neng•nikaniko man•a aro gimikande kamna porikka sepana chel•a biapchi songreangna chol ong•paja, indakgipa neng•nikanirangko Garo Hills-o chagrongenga. Garo Hills-o indakgipa exam centre-rang ba porikka sechakram biaprang dongjani a•sel re•anggipa September 30 tariko dingtang dingtang kamrangna porikkarangko sena aro admission ka•na songreangenggipa chadamberang dal•begipa a•selko chagronge janggitangtangko gimaataha. Uni gimin Garo Hills-o SBI Banking Exam Centre-ko ra•gate on•china SBI-Regional Branch Manager-ko FKJGP-Garo Hills Zone mol•molangaha.
Unbaksana Garo Hills-oni mongsongbate songadamrango donggipa candidate-rang a•gital biaprangchi re•angahaon dongchakanina namen neng•nikaniko man•bata.
Uni gimin uandakgipa neng•nikaniko man•enggipa Garo Hills-ni candidaterangni aro manderangni namgnina chanchie Garo Hills-o ge•sa ba ge•gni SBI Banking Examination Centre-rangko ge•sa Tura-o ge•gipinko Garo Hills-ni je bakoba ta•rake ra•gate on•china FKJGP, Garo Hills Zone, dabiangaha.