Chokpot, December 8, 2021: Garoland State Movement Committee (GSMC) Monggolbar salo Chokpot Sabiagre songni manderang baksa tom•e chanchirimaniko dakangaha.
Indake ua tom•anio GSMC, HQ-ni Assistant General Secretary Cyril A.Sangma, GSMC Babadam Regional Unit-ni Environmental Secretary Silbath A Sangma aro GSMC Chokpot Unit-ni Chief Advicer Obeston M Sangma mongsonggipa sokgipa ong•e tom•aniko dilangaha.
Ua tom•anio jolni manderang rama jal•ang namgijako re•na nangani gimin, wachini somoio bajar anti, skul aro dingtang dingtang kam nanganirangna ja•achi re•a doanio namen neng•nikaniko man•enga. Indakgipa rama sorokrangko bilsi chasong gimik chagronge jolni manderang GSMC-ko tom•aniona okamataha.
Cyril Sangma-ni u•iata gitade songni manderang GSMC-ni dilgiparangko niroke kamrangko ka•e on•pachina aro sorkari baksa agangrike re•a doani rama jal•angrangko tarie on•china didiangtokaha. Maina Chokpot jolni a•arang wachini somoio namen namjabegipa aro a•a stapgipa ong•ani gimin gari gora re•na gita man•jachim, uni a•sel jolo songdonggipa manderang wachikario pilak nanganirangna ong•kat re•ramna gita neng•nikanirangko chakna amjae GSMC-ni dilgiparangko okamna nangaha ine u•iataha.
Cyril Sangma uamangni didia gita man•a dipet uamangni neng•nikaniko aro dabianiko chu•sokate on•na gita cholko on•gen aro sorkari baksa ta•rakale agangrikgen ine ka•dongatani kattarangko songni nokni manderangna aganne donbaha ine koborna u•iataha.