Tura, Nov 28, 2022:Garo Hills-ni nangrimgimin NGO-rang jekai GSU-CEC, HQ Tura, Garoland State Movement Committee (GSMC), All A•chik Youth Welfare Society (AAYWS) aro gipin NGO-rang Sombar salo Seperate Electoral Roll (SER) aro Garo Customary Law (GCL)-ko da•onaba ra•gate on•kujaengani gimin, dabie GHADC Session-ni skanggipa salo gisik ra•atpiltaianiko dake GHADC Office mikkango asonge jingjengataniko a•bachengataha.
NGO-rangni ru•uta sal somoirangoni dabienggipa SER aro GCL-ko da•onaba ra•gate on•kujaengani gimin, ta•rake Seperate Electoral Roll-ko GHADC-o segatchina, jedakode gipin jatrang GHADC eleksino susana aro vote pu•onna man•jawa. Maina India a•songni Niam-Bidiko pangchake a•brio songdonggipa manderangna dingtangmancha Sixth Schedule-ko on•aha, uni gimin GHADC-de A•chikrangnisa gipin jatrang maming dakeba bakko ra•na man•ja.
Minggipin, A•chikrangni Niam-Retti-rang aro dakbewal rikbewal-rangko see ripingna nangchongmotgipa GCL-ko ra•gatchina dabie, da•alo asonge jingjengataniko a•bachengataha aro ia jingjengataniko salgnina ong•atanggen ine GSU-CEC-ni Preaident Zikku Balgra N.Marak kobor ra•timgiparangna aganaha.
Indake salgnina asonge jingjengataniko dakengon, angaba A•chikan ine chanchiode, GHADC-ko chalaienggipa Executive Committee aro Warachakenggipa dolni MDC-rang A•chik jatni namgnina ku•monge, SER aro GCL-ko ta•rake ra•gatchina NGO-rang didiangaha.
Unbaksana, salgnina asonge jingjengatanio pilak NGO-rang aro A•chik a•songni manderang, angaba A•chikni an•chian ine chanchigenchimode, a•songe jingjengataniona sakantian re•bae bakko ra•epachina gitaba NGO-rang mol•molataha.