Indian Army-ni kosako jegale NESO-ni ong•atgipa demonstration-o GH-ni NGO-rang bakko ra•e chakpaaniko on•anga
Tura, December 9, 2021: Garo Hills-ni nangrimgimin NGO-rang jekai GSU, FKJGP, ADE aro AYWO, re•anggipa Sonibar attamo Nagaland a•dokni Mon District-o donggipa Oting songo Indian Army-rangni sak 13 dos gri ramram kam ka•e cha•enggipa manderangko chadrape so•otanina Salgro Salaram a•dok gimiko NESO-ni ong•atgipa ‘Demonstration’ -o bakko ra•e, Tura songjinmani DC Office mikkango demonstration-ko Bristibar salo ong•atangaha.
NESO, Indian Army-rangni ka•saninggijagipa kamko jegale North East a•dok gimiko Demonstration-ko ong•ate, duko ga•akgipa Naga nokdangrangna kakket bichalko on•china aro ka•namgijagipa Armed Forces Special Powers Act (AFSPA)-ko ra•galchina dabiangaha.
AFSPA-ko 1958 bilsio Bristist sorkarini ra•gatangimin niam ba Act ong•a, ua act-ko India sorkari bon•atgija Salgro Salaram a•doko donengkuani gimin, a•doko so•sojengjeng manderangna kenbegniko on•engani a•sel army-rang an•tangtangni bilko jakkale dos gri ramram manderangko rim•e, sasti on•ne, me•chikrangko til•ekdrae skatang so•ote galaniara ka•saninggijani kam ong•a ine NESO-ni Adviser, Manseng A.Sangma agan talatangaha.
Ia niamra songdongenggipa manderangna nemen kenbegnigipa ong•a, maina army-rang chu•gimik an•tangtangni bilko jakkale manderangni kosako kragija rakgipa sinjetaniko on•ne ramram manderangko ka•saninggija so•ote galanina NESO jegale salgro salaram a•dokoniko AFSPA-ko ta•rake ra•galchina dabiangaha.
Apsandake Garo Hills-o saksa bilsi 17 ong•gipa me•chik bi•sako ka•saninggija so•ote galanikoba NGO-rang raken jegalangaha aro duko ga•akgipa nokdangna kakket bichalko on•china dos dakgiparangna raka sasti on•china dabiangjolaha.
Ka•saninggija so•otako man•ne singanggipa me•chik bi•sa Chandapara songoni ong•achim, ua December 1 tariko selection test porikkako sena gita re•anngaha, indake ua saloni noktangona sokangpiljahani gimin nokdangni manderang Dalu pulis station-o December 3 tariko missing reportko on•eaha.
Indake pulisrang badi ka•ako man•ne ta•raken sandianiko dakenba December 4 tarik Sonibar pringo ua me•chik bi•sani sigimin manggisiko Dangdugre songni buring griponiko man•aha. Indake me•chikrangni kosako ong•gija dake so•otaniko NGO-rang jegale kakket bichalko on•china dabiangaha.