Sak 11 Congress MDC-rang AITC-o napanga

0
Tura, December 10, 2021: Meghalaya a•dokni sak 12 MLA-rang Congress doloni ong•kate All India Trinamool Congress (AITC) dolo napangani ja•man AITC ka•sinsin bilakrorobaengahani gimin GHADC-ni sak 11 Congress MDC-rang Brisibar salo AITC-o napgopangtokaha. Indake skanggipa changna GHADC-ni Ma•ambio Congress dol bon•atsrangako man•aha.
Apsandake Butbar salosan bang•a chadamberang Congress dolni ong•katgrime AITC-o napangani ja•mano Bristibar saloba sak 11 Congress MDC-rangba Resubelpara-o ong•atanggipa tom•bimongaona re•ange AITC-o napgopange Congress dolko bilgriataha.
GHADC-ni sak 11 MDC-rangko AITC-ona rimchaksona Meghalaya-ni gitcham Skotong Minister aro AITC-ni gital dilgipa Dr Mukul Sangma, Resubelpara-o jinma tom•bimonganiko ong•atangaha.
Meghalaya a•doko BJP aro NPP dolko warachakna gita Congress dol bilgriahani gimin AITC dolna nambatgipa ong•skaenga ine Williamnagar-ni MDC Alphonsus R.Marak Bristibar salo kobor ra•timgiparangna aganaha.
Congress doloni ong•kate AITC-o napanggipa MDC-rangara, Dengnakpara-ni MDC Sadhiarani M. Sangma, Boldamgre-ni MDC Stevie M.Marak, Williamnagar-ni MDC Alphonsus R.Marak, Balachanda-ni MDC Agassi R.Marak, Samandagre-ni MDC Lahitson Sangma, Amongpara-ni MDC Nehru D.Sangma, Kharkutta MDC Cherak W.Momin, Damas-ni MDC Ferdinand D Shira, Betasing-ni MDC Sonjoy Koch, Rongrong-ni MDC Renaldo K.Sangma ong•achim.
Indake ong•engon, Shyamnagar-ni Congress MDC Habibuz Zaman degipako sanna gipin biapchi re•angani gimin Resubelpara tom•anio re•angna man•jaha, indiba ja•mano AITC-o napeskagen ine u•iataha.
AITC, Meghalaya a•doko gital atchigipa dol ong•genchimoba, mikkangchi apsan ku•monge jat aro a•songna rakbate kamko ka•anggen gita ine Dr Mukul Sangma tom•anio jinmana agandapangaha.
Leave A Reply

Your email address will not be published.