Tura, Nov 21, 2022: Re•baenggipa 2023 bilsini Assembly Election-o RPI candidate Novembirth Ch.Marak, 59-Chokpot elakkao bilakgipa dolbri Political dolrang jekai NPP, TMC, GNC aro INC baksa susaanggen.
Novembirth Marak saksa chadamberangoni gisik a•ning bitgipa, niksenggipa, A•chik jatna ka•sae jatni namgnina an•tangko on•kange re•mikkangenggiparanoni saksa ong•a. Ua saksa kangal nokdangoni ong•e, kangal cholgri manderangna ka•sagipa, jatni duk mikchi ong•aniko ma•sigipa ong•a.
Batanggimin sal somoirango uni janggi tanganio bang•a neng•nikanirangko chagronggenchimoba, an•tangni jatna ka•oksianiko da•alo parake re•mikkangengaha.
Bang•a manderang Novembirth Marak-ni kosako ong•gija kattarangko aganne, social mediarang jangbingbangatgenchimoba, ua an•tangni miksonge re•mikkanganio maming jajaani gri Chokpot elakkani dingtang dingtang polling station-rang aro manderangko gronge ku•monganiko dakenga ine parakataha.
Novembirth Marak-ni Chokpot elakkao candidate ong•e, susaani miksongara, “Meghalaya a•dokko man•chengaoni da•alona kingking Garo Hills-o donggipa ge 24 elakkarangoni Chokpot elakkan ja•machakbatsranggipa ong•enga, Chokpot jolo maming namdapani aro tang•dodapani dongja. Uarangko nike anga maini a•sel dilgiparang Chokpot jolrangko nikchangenga, ine angni gisiko chakna amjae, dingtangdingtang songni manderang, ma•gipa pagiparang, jongada, no-abirangko grong namsange nion, anga manderangni dukko ma•siaha, iarang gimikan political issue ong•a. Uni gimin maidakode Chokpot jolna kamko ka•na man•gen, ku•monganiko dake da•alo anga Chokpot elakkao susaenga” ine Novembirth Marak parakataha.
Novembirth Marak-ni u•iatani gitade, re•anggipa 2021 bilsini January jaoni da•alona kingking dontonggija Chokpot jolni manderangko gronge ku•monganiko dakenga aro bang•a manderang Chokpot-o dingtanganiko ra•bana apsan ku•monganiko dakenga ineba u•iataha.