Williamnagar, Nov. 22, 2022: East Garo Hills a•jani Rongjeng block-o donggipa Baringgre Nengsil Govt LP Skulo ru•uta bilsirangna skigipa gri galchipe donenga ine Niksamso Garo Community Organisation (NGCO) HQ Simsanggre-oni parakataha.
Baringgre Nengsil Govt LP skulo skigipa gri galchipe donanichi poraienggipa bi•sarangna dal•bea gimaani ong•engaha. East Garo Hills a•jani Education Department ua skulo da•onaba skigipako appoint ka•kuja. Ua skulo sak 40-na bate poraienggipa bi•sarang donga ineba janapataha.
“Chinga songni manderangni complaint-ko man•soani gimin re•ange sandianiko dakon, skul nokko gital rike skigipa gri donenga ine nikna man•aha aro ua skulo skigipa gri bimingna skul nokko rike donani a•sel poraienggipa bi•sarangna dal•bea gimaani ong•enga” ine NGCO-ni President Tengrak Marak parakataha.
Indake Baringgre Nengsil songna Sorkarini on•gimin LP Skulko ru•uta bilsirangna skigipa gri galchipe donaniara skie ra•enggipa bi•sarangni mikkangchi dal•lang, chuanggniko bon•chongdikatani ong•a. Uni gimin, Education Department ta•rake Baringgre Nengsil Govt LP skulo skigiparangko rakkie on•china NGCO didiataha.