Tura, Nov 21, 2022:Batanggimin 2015 bilsioni da•alona kingkingba Phulbari elakkani ning•o darang MLA aro MDC-rangan football kal•susaaniko ong•atna gisiko nangjaha ine A•chik Students’ Welfare Association (ASWA) Phulbari Regional Unit parakataha.
Indake chadamberang kal•susaaniko ranta ka•e be•en bimangko an•sengatna aro uamangni changa sapaniko mesokna man•jaengani gimin, ASWA HQ-ni Vice President Walman R.Marak namgipa cholko ra•e, Phulbari-o football kal•susaaniko ong•ataha.
Indake ia kal•susaanio mande ra•bee okamako man•gipa, BJP candidate Salgrak R.Marak-ba dongpae bakko ra•angaha.
Ia football kal•susaaniko re•anggipa November 11 tarikoni 19 tarikona ong•atangaha ine koborna u•iataha.
Indake bon•kamgipa kal•susaanio Rondupara baksa Rongadatgre dolgni ga•subee kal•susaangaha. Ia kal•susaanio Rondupara, Rongadatgre-ko goal 4 chipe chegipa ong•aha, jeon Rongadatgre goalsakonsan chipna man•ne, gnigipa biapko man•rikskaha.