Shillong, November 15, 2022: Meghalaya a•dokni Mahatma Gandhi University-na Fake Degree Certificate-ko tarigipa sakdok manderangko Telengana Pulisrang Monggolbar salo rim•aha ine koborna parakataha.
A•dokni Mahatma Gandhi University Ri-Bhoi a•jani Khanapara biapo donga. Unbaksana West Garo Hills a•jani Tura-oba MG University Campus donga ine u•iataha.
Koborna parakatani gitade, Cyberabad Special Operation Team (SOT) aro Miyapur pulisrang, Monggolbar salo Fake Degree Certificate tarigipa manderangko rim•aha aro uamangoniko tangka gong hajar 50, king 157 memo, bill book aro bang•a University-ni Letter Pad-rang baksa mobile phone-rangko ra•sekaha.
Rim•a man•gipa manderanga Dinesh Singh, Akhilesh Semwal, Tajinder Singh, Garikapati Venkata, Bhaskar Satyanarayana Sharma, Geekuru Prem Kumar aro Singrapuru Sujatha ong•achim.
Unbaksana Mahatma Gandhi University (MGU)-ni Director Milie Goel aro Clerk Shivani fake certificate tarianio bak dongpaa, indiba uamang pulisrangoni kate chakenga ine kobor man•aha.
Cyberabad pulisni u•iatani gitade, Miyapur songoni saksa Khaja Shaik Nayab Rasool, Bhaskar Sharma baksa agangolpogrikenba, una Degree Course-ko man•ne on•china mol•molaha. Indake Sharma, Nayab Rasool-ko Mahatma Gandhi University-ni mande Garikapati aro Prem-ko grongdilaha aro ua chu•gimik document-rangko uamangni jako on•aha. Uamangni kattako bebe ra•e Rasool sakgipinna tangka gong lak 2-ko transfer ka•ataha. Indake tangka transfer ka•atani salgni ja•mano ua 2014,15 aro 16 bilsini certificate-rang aro memo-rangko Prem Kumar-ni jak gita man•soaha. Sing•sandianiko dakenba verify ka•ani ja•mano, ua memo-rang aro certificate-rang asol ong•ja, indiba tol•gipasa ine rim•a man•ani bakan, ua pulis station-ona re•ange badi ka•eaha.
Badi ka•ako man•ani ja•mano Pulisrang Garikapati Yadav aro Prem Kumar-ko rim•aha.
Pulisni parakatani gitade, Akhilesh aro Prem Mahatma Gandhi University-o kam ka•enggipa Akhilesh Semwal, Dinesh Singh aro Tajinder Singh-ko rim•aha. Uamang sak 430 manderangna University-ni bimingo Fake Degree Certificate-raangko tarie on•aha ine ku•rachakaha.