NGH a•jani manderangna Skotong Minister Fund-rang aro jillanirangko suale on•anga

Resubelpara, November 15, 2022: North Garo Hills a•jani ning•o donggipa Adokgre songni manderangna Skotong Minister Conrad Sangma fund-rang aro jillanirangko Monggolbar salo suale on•angaha.

Skotong Minister Conrad Sangma dam 8 IVCS (Integrated Village Cooperative Society)-na gong kror 1 lak 54, hajal 65 tangkarangko Piggery Mission Phase 3-o pangchake sualangaha. Unbaksana FOCUS+ni gitaba game ge•e cha•gipa nokdang ge 2387 manderangna lak 23 hajar 87 tangkarangko sualangaha. FOUCS+ian FOCUS Program-ni bak ong•a. Ia program game ge•e cha•giparangna dingtangmancha dakchakaniko on•na miksongani ong•a.

FOCUS+ aro FOCUS, ia ge•gni Scheme-rang game ge•e cha•gipa nokdangna gong hajar 10 tangkarangko on•gen. Self Help Group (SHG)-rangni namgnina, Community Investment Fund (CIF) gong lak 14 hajar 50 tangkarangko dam 5 songni Organization-rangna sualangaha. Unbaksana ge 4 SHG-rangna gong lak 4 tangkarangko bank loan-na on•ataha.

Rural Backyard Piggery Scheme (PROGRESS)-ni gita, mang 2000 (bima mang 3 aro bipa mang 1) wak bi•sarangko NGH a•jani ge 500 nokdangni manderangna sualangaha. Una agreba Kroiler do•orangko sak 100 kangal manderangna sualangjolaha.

Skotong Minister Conrad Sangma, jinmana aganprakengon, “Chinga Adokgre songni manderangna fund-rangmo aro jillanirangko suale on•na kusi ong•a. A•dokni game ge•e cha•gipa pilak manderangna dakchakaniko on•anian, chingni miksongani ong•a. Self Help Group 2018 bilsio 5814-san ong•genchimoba, 2022 bilsio 41700-ona tang•dodapaha. Uandake a•dokni bang•a me•chikrangba bakko ra•e kam ka•na cholko man•enga. Batanggimin bilsi 4-ni gisepo chinga bang•a kamrangko ka•e a•dokni manderangna namgniko ra•baaha” ine aganangaha.