JH o mande so•otgipa saksani magipa, depante ko janggi tanga gimikna pattok o chipatchina dabianga
Shillong, September 9, 2022: Jaintia Hills o taxi driver sakgni ko so•ote galanggipa sak bri manderangko rim•a man•ani anti gni ja•man Tonseng-Narpuh songo dos dakgipa manderangko kraa gita sastiko on•china dabianiko dakenba re•jomaniko dakangaha.
Ia re•jomaniko East Jaintia Hills a•jani Tonseng-Narpuh songni dilgiparang ong•atangaha. Uamang tourist taxi driver sakgni ko ka•saninggija so•ote galgipa manderangko kraa gita sastiko man•a nanga ine dabienba re•jomaniko dakangaha.
I Love You Talang, Tell Me Pyrtuh, Ramesh Dkhar aro Sampher Ksoo maang sakbri ko Damehipaia Papeng aro Fullmoon Kharsanoh ko so•otanina anti gni skang rim•angaha.
Kobor ra•timgiparangna aganprakengon Mela Dkhar, “Anga an•tangni depante ko man•pilna gita dabie re•jomaniko dakjaenga, indiba anga an•tangni janggina kennesa jinma baksa re•jomanio bakko ra•enga. Dos ko dakgipa manderang aro uano bak dongpagipa angni depante ko uamangni dos ni kri rakgen sastiko onna nanga aro sastiko on•engon maming dakeba ka•sachakna nangja. Ramesh ko pattok oni watna nangja, ua pattok oni jokgenchimode anga janggitangna kensoa. Court uamangko pasi onna nanga, on•jagenchimode janggi tanga gimikna pattok o chipkete donna nanga” ine ma•gipa aganaha.
Ua re•jomanio jinma baksa bakko ra•engon uni jak o ra•bitgipa lekka o, ” Set phatok shijingim ia ki nongpyniap briew” ine Khasi ku•sikchi sea gnang jean A•chikku chi ” Dos ko dakgipa manderangko janggi tanga gimikna pattok o chipe donna nanga” ine segipa lekka ko ra•bite uamangna kraa gita sastiko onna nanga ine dabiangaha. Bristibar salni bak o ong•atanggipa re•jomanio, Ramesh Dkhar ni magipa Mela Dkhar baan bakko raangaha.
Songoni saksa Waheh Shnong Chewanbiang Rymbai ni aganani gitade, 2020 bilsini March 22 tarik o Tonseng-Narpuh songni me•chikma saksa Kranti Sutnga ko so•otanioba Ramesh jak donga ine u•iataha. Apsandaken, 2020 bilsioba songni dilgiparang aro mahari rang Ramesh ko janggi tanga gimikna pattok o chipatchina authority rango molmolangahachim. Indiba ua bilsi sa gipa oan pattok oni jokako man•aha. Indake ua pattok o donatako man•genchimoba ua gisik pil•kujani a•sel sakgni manderangni janggiko ka•saninggija indin so•ote galaha. Uni gimin ua pattok oni jokpiltaigenchimode songni manderangni janggina kenani onggen ine Rymbai aganaha.